黑盒應該裝在何處？

黑盒應該裝在何處？　憤怒鳥

話說最近學校課室門口都多左好多黑盒，一問之下，方知是保安門禁之用，學生上課不用拍卡，而是教授上課前要「打卡」。我當堂打左個突，然後得啖笑，大佬呀，講大話都講得好小小啦，全嶺南最需要打卡的人都係嶺南三大邪惡組織返工，同我講佢地返工唔洗打卡？教授去上堂就要打卡？用幾百萬裝埋啲打卡機？真係憤怒了。

話說有一次我去黃＿的_MIP拎小小野，去之前我已經好醒咁去學校網站睇下_MIP幾時完午飯時間，你知啦，阻人食飯，尢如殺人全家。佢話一點半辦公，我一點半上去，實無死啦。一上去到，入面開住燈，門口鎖左一個人都冇，我即刻走番出去睇下有冇入錯校長室，一睇，又冇錯丫！我於是等呀等，等下等下等左五分鐘都冇人返，心中除左粗口都冇乜野好講，就走左去轉個頭先返。如是者又過左十分鐘，我又上去，門口個牌終於變左OPEN啦！我滿心歡喜入去搵人，未推開度門已經有啲寒氣浸出黎，入到去有個職員係房入面飄住咁行出黎問我做咩，當堂有Ｄ心寒，我話拎野，點知原來果個負責同事去左食飯仲未返，我一眼掃過去，成個部門得佢一個人，冷氣又開得咁大，唔怪得知咁寒啦。一面睇，我一路心諗：哎，估唔到有房坐的人反而係低級Ｄ要返黎開門，高級Ｄ坐外面的人就可以食晏Ｄ晏，真係難撈喇現在。我個腦仲諗住佢地Ｄ辦公室政治同呢個世界真係唔公平的時候，我決定去做其他野先，過多半個鐘先返黎_MIP拎野，終於先比我拎到。

我絕對唔係要督背脊或者葡萄佢地，我都支持彈性上下班時間，不過唔支持彈性午餐時間，打亂我個行程就唔係咁好啦。或者佢地有苦衷，可能因為好多野做所以遲左放飯，諗住跑去飯堂食三星飯就算，點知跑到永安拗柴，要去睇埋跌打先可以拐拐下行番黎，所以遲左。但你諗下，教授唔黎上堂又唔洗補堂就話皆大歡喜遮，你個行政唔黎做野阻住哂就人見人憎，一個小小部門都可以咁把炮遲幾個字先返，一個人遲幾個字，夾埋一日就遲左一個鐘，一個月夾埋就好似放多左三日假咁。

所以計我話，最好每個學校行政部門都裝個黑盒，紅外線體溫感應器，員工進出要打卡，學生可以登入內聯網查到學校職員有冇遲到早走，出入有冇閂電腦同冷氣，冷氣有冇定死廿五度，最好有網絡記錄CHECK住有冇偷偷地玩FACEBOOK同MSN唔做野，全民監察學校運作，不出一個月，學校的冗員一定無所循形，資源運用一定好過以前。先由學校中央行政機構做起，上行下效，學生自然會養成節約環保之風氣，你話丫咁係唔係咁先做到野，唔系咁點對得住納稅人金錢？